Archive | August, 2016

زهر

17 Aug

أوّل ما الصبح يطلّ
جنيّات زغار بتاخدك منّي
بتعمّدك بحبّات الندى
وأنا وحدي بفلّ ع الهَدا

بشوف الشمس عم بتملّي الفضا
مغرورة بتقشع بحالا
ولمّا تشوفك بتجنّ
وبتنسى الناس ال فاقوا كرمالا
بتغمرك..
بتضّل حدك ما بدّا تفل

وفراشة من بعيد توميلك
تتغنج عليك..
بتقرّب منّك شوي شوي
بتشرب من شفافك..
بتسْكر
وبتفلّ مرنّحة
بعلما رايحة صوب الشمس
فكرا عم بتطير،
و هيّ بعدا بمطرحا

كل نسمة بتمرق، بتراقصك..
بتخبّر عنك كل وردات الحي
وبتنشر عطرك بالمدى

أنا بشوف كل هيدا و بجنّ
بفكّر كيف فيي خبيك بقلبي
وكذب عالجنيّات، قلّن:
صرلو جمعتين ما طل صوبي
جمعتين ما شكّيت زهرة بخصلات شعري الملتوية
جمعتين ما لفّيت عقد زهر ع رقبتي

ولمحة شيطنة بعيوني بتفضحني

بس كيف بخبّيك بقلبي
كيف؟! كيف، وانت الدني ما بتساعك!
ومين المجنون اللي بيحبس زهر..