لبنان والباسكت بول

بما إنّو لبنان عم يلعب ببطولة كأس العالم لكرة السلّة، وبما إنّو شلت إيدي من زمان من هاللعبة بعد ما نزعتا السياسة والطائفية بالبلد.. حبّيت شاركّن هالشي يللي كتبتو السنة الماضية، مع أمل إنّو يكفّي لبنان ويربح كمان

هيدا يا جماعة الخير اليوم وعيت صوب الساعة سبعة الّا ربع، سبعة الّا عشرة، وأنا بعدني نص نايمة دوّرت هالراديو.. بفتّش بهالاذاعات ع صوت فيروز..

سألوني الناس عنك يا حبيبي، كتبوا المكاتيب وأخدها الهوا.. عم سلطن وأنا، كمان، بعدني نص نايمة..سمعت كم غنيّة وراها بعدين قمت من تختي تحضّر قهوة الصباح (نسكافيه).. رجعت ع الأوضة و يييي ليك شو حاطين:

نمّ بكّير و قُم بكّير.. شوف الصحة كيف بتصير

*رياضة شي حلو كتير.. ع “روتانا” لمّا تقوم ع السبعة و نص

و آخر مرّة سمعتا هاي، كانت بعدا عـ “الدلتا” لمّا تقوم عالسبعة و نص.
ليه مهمة كتير هالغنيّة؟!!
من زمان، انّو ع ايام المدرسة، كنت عيّر الوقت اللي بوصل في الصبح عالمدرسة ع هالبروجرام. قد ما كان يلف فينا هالأوتوكار ليّلم الطلاب من بيوتن، كنت حس انّو هالكزدورة الصباحية تبقى تاخد أكتر من نص ساعة. انّوهيدا تأخر حتى فاق، و هيديك نسيت الساندوِش.. بس رهيب هالشوفير، ولا مرّة تأخرنا.. طيب ، بَلا طول سيرة، كنت لحّق اسمع شويّة أخبار رياضية مع “فارس” قبل ما انزل ع المدرسة، أهمّا شي كان الباسكت بول، اسمع التحليل عن الجايم قبل بليلة و زرّك لرفيقتي لمّا الرياضي يخسر.
آخر جايم حضرتا كانت بين الحكمة  والرياضي، صار مَشكل وقتا “متل دايما”، بعدو نزلوا الرياضي ع الملعب بس ما لعبوا، سو انحسبت اللعبة لصالح الحكمة.. بذكر كنت باك 1 يعني من شي ستة سنين.. ومن وقتا لا رجعت سمعت فارس كرم ع السبعة ونص ولا حضرت شي جايم.
اليوم، ولأجل شويّة حنين لهيديك الإيام، سمعت هالنشرة الرياضية.. وفهمت انّو صاير مشكل “شي كبير يعني” واتحاد كل نادي عم يطلّع خبريّات و بدّن يوصلوا لتسوية.. خمس سنين يا زلمة وما تغيّر شي.. متل المسلسلات المكسيكية، بصير وقت الامتحانات الفصلية، بتقطّعلك شي عشرين..تلاتين حلقة، بترجع و بعدن مطرح ما تركتن..
بس بيناتنا ما انصدمت لأن هيدا لبنان..
اللي صدمني انّو غسان سركيس و فادي الخطيب صاروا بالرياضي.. ايه والله انصدمت .
أفضل حل للرياضة عنّا بلبنان، يلعبوا هاي لعبة الوايلد وست..كل حدن يمسك فرد..يوقفوا بوج بعضن.. 3 2 1 و يقوّصوا
هيك واحد بيموت و التاني ع الحبس “فخور طبعاً” و ما بيبقى مين يخبّر..
انّو أكيد ما بيخلصوا كلّن.. مين بيبقى؟!!
رؤسا “هالنوادي” أكيد باقيين..الرؤسا بيبقوا، انّو اذا لا قدّر الله و مات شي واحد، ولوّ، في ابنو.
بس ساعتا يشيلولي هالأرزة من على طريق المطار، اللي عم تستقبل “الأجانب” و يحطوا هالصورة.
انّووو شو بعبّر عن لبنان أكتر من هيك؟

أغنية برنامج  رياضي صباحي على إذاعة الدلتا سابقاً، روتانا الآن*

زينه المصري
2-2-2009
8:25 am